ԱՌԻն 6 Միլիոն Տոլարի Ներդրում Կատարած Է Արցախի Քաշաթաղ Եւ Շահումեան Շրջաններուն Մէջ

 

Հինգշաբթի, 9 Մարտի երեկոյեան, Պէյրութի «Արմէնիա» պողոտայի «Իթալիըն Փրոճեք»չ ճաշարանին մէջ տեղի ունեցաւ «Արցախ Ռուց Ինվեսթմըն»չ (ԱՌԻ) ընկերութեան տարեկան ընդհանուր ժողովը:

Խօսք առաւ ընկերութեան նախագահ Սուրէն Սարգիսեան: Ան ողջունեց հին ու նոր շահընկերները՝ «ԱՌԻական»ները: Ապա ընթերցեց Արցախի վարչապետ Արա Յարութիւնեանի հետեւեալ խօսքը՝ ուղղուած ներկաներուն.

«Սիրելի՛ ԱՌԻական ընկերներ,

Շատ էի ցանկանում ներկայ լինել ձեր տարեկան ժողովին, սակայն ցաւօք, աշխատանքային ծանր բեռնուածութիւնից ելնելով, չկարողացայ այցելել Լիբանան: Ուստի իմ հեռակայ ողջոյններն ու շնորհակալութիւններն եմ յղում ձեզ՝ յոյս յայտնելով, որ առաջիկայում հանդիպելու հնարաւորութիւն ունենանք: Ուրախութեամբ փաստում եմ, որ ԱՌԻն լաւ արդիւնքներով է փակել 2016 թուականը, իր ներդրումն ունենալով Արցախի զարգացման գործում, եւ վստահ եմ, որ 2017 թուականին դեռ աւելի մեծ են լինելու ձեր ներդրումներն ու յաջողութիւնները: Կ՛ուզէի հաւաստիացնել, որ այդ ճանապարհին Արցախի կառավարութիւնն իր հերթին պատրաստակամ է առաւելագոյն աջակցութիւն ցուցաբերել ԱՌԻի հայրենանուէր ջանքերին: Բարի ընթացք եմ մաղթում ԱՌԻական այս ժողովի քննարկումներին»:

Ապա խօսք առաւ ԱՌԻ ընկերութեան վարչական խորհուրդի անդամ Մասիս Ալեքսանտրեան, որ սահիկներու ցուցադրութեամբ ներկայացուց ԱՌԻի աշխատանքը:

Ան նախ ընդհանուր գիծերու մէջ ներկայացուց ԱՌԻի ստեղծման պատճառն ու նպատակը, եւ ըսաւ. ««Հողը նրան է, ով այնտեղ ապրում է»: Հազարաւոր ազատամարտիկներ իրենց արիւնը թափեցին ազատագրելու համար տարածքներ, որոնք ամայի կը մնան: Եթէ այդ տարածքները չվերաբնակեցուին, ուշ կամ կանուխ զանոնք կը կորսնցնենք: Հետեւաբար ԱՌԻն եկաւ օժանդակելու համար Արցախի ժողովուրդի վերաբնակեցումին»: Ան աւելցուց, որ գիւղացիներուն հասանելի չեն դրամատուները: Իսկ Արցախի մէջ ամէն տեսակ ազդակներ կան՝ բնութիւնը, մարդուժը, առատ ջուրը, սակայն կը պակսէր դրամագլուխը: ԱՌԻն եկաւ այդ բացը գոցելու, գիւղացիին հայթայթեց այն դրամագլուխը, զոր պէտք ունէր, որպէսզի զարգացնէ իր աշխատանքը, արտը մեծցնէ եւ կովերը բազմապատկէ:

Մասիս Ալեքսանտրեան նաեւ անդրադարձաւ ԱՌԻի գործունէութեան «Պիզնըս Մատըլ»ին: Անհատը անդամ կը դառնայ ԱՌԻին շատ փոքր գումարով մը, որմէ ետք կը կատարէ դրամարկումը, որ կը կատարուի գումարի փոխանցումով: Այդ գումարը կը տրուի գիւղացիին՝ իբրեւ փոխատուութիւն երեք տարուան համար: Իւրաքանչիւր տարուան աւարտին դրամարկողը կը ստանայ տոկոսը: ԱՌԻն իր կարգին այդ գումարները կը փոխանցէ պետութեան պատկանող հիմնադրամի մը, որ կը կոչուի «Գիւղ» հիմնադրամ՝ «Ակրոֆոնտ», որ իր կարգին գումարը կու տայ գիւղացիին: Գիւղացին կը գործածէ այդ գումարը արտը մշակելու, քաղաքը մեծցնելու: Ապա այդ գումարները ետ կը տրուին ԱՌԻին եւ ԱՌԻն ետ կու տայ զանոնք «գիւղ» հիմնադրամին. հիմնադրամը զանոնք ետ կը փոխանցէ ԱՌԻին եւ վերջապէս ԱՌԻն կը վերադարձնէ զանոնք դրամարկողներուն:

Մասիս Ալեքսանտրեան խօսեցաւ նաեւ 2016ի ցուցանիշներուն մասին: ԱՌԻին մաս կը կազմէին 16 անհատներ, իսկ այժմ անիկա ունի 187 բաժնետէր: Ընկերութիւնը սկսած է 300,000 տոլար գումարով մը, իսկ այժմ անիկա բաժնետէրերէն ստացած է 3,700,000 տոլարի վարկ: ԱՌԻն իր կարգին «Գիւղ» հիմնադրամին փոխանցած է 4,100,000 տոլար եւ 1,800,000 տոլար յատկացուցած է շինարարութեան: Այսինքն՝ շուրջ 6,000,000 տոլարի ներդրում կատարած է ԱՌԻն Արցախի Քաշաթաղ եւ Շահումեան շրջաններուն մէջ, որոնք Հայաստանը եւ Արցախը կը շաղկապեն: Ցարդ, 8 տարիներու ընթացքին ԱՌԻն իր բաժնետէրերուն բաժնած է շուրջ 900,000 տոլարի գումար մը: Իր բոլոր պարտաւորութիւնները կատարելէ եւ բաժնետէրերուն տոկոսները վճարելէ ետք, ԱՌԻն տարին կը փակէ 18,000 տոլար շահով մը:

Այժմ ԱՌԻն «Գիւղ» հիմնադրամին տուած է 1,600,000 տոլար: Իսկ շինարարական աշխատանքներուն համար տուած է 1,700,000 տոլար եւ բաժնետէրերէն ստացած է 3,700,000 տոլար:

Ապա խօսք առաւ ԱՌԻի վարչական խորհուրդի անդամ Վահան Գասարճեան: Ան, խօսելով ժողովի վայրին ընտրութեան մասին՝ ըսաւ, թէ այս ճաշարանը կը գտնուի «Արմէնիա» պողոտային վրայ, որ յատկանշական է եւ Պէյրութի ամէնէն հին թաղերէն մէկն է:

Գասարճեան ըսաւ, թէ այժմ Արցախի մասին հարցերու եւ պատերազմի մասին կը լսենք, սակայն երբ անդրադառնանք գետնի վրայ եղող տուեալներու, ուրիշ տարբերակներ կը տեսնենք:

Ան խօսեցաւ Արցախի տնտեսութեան մէջ Համախառն ներքին արդիւնքի աճին մասին: Անցնող տարի 9.1 առ հարիւրի աճ եղած է Արցախի մէջ: Իսկ մէկ անհատի հաշուով համախառն ներքին արդիւնքը անցած տասը տարիներուն նաեւ աճ արձանագրած է եւ այսօր անիկա շուրջ 3000 տոլար է: Այժմ նաեւ Արցախի արտադրութեան վրայ մեծ աշխատանք կը տարուի: Ան նշեց նաեւ, որ Վարդենիս-Մարտակերտ ճամբան աւարտելու վրայ է, որ նաեւ մեծ դեր պիտի ունենայ տնտեսութեան վրայ:

Արցախի մէջ ԱՌԻի ներդրումին մասին խօսելով՝ Գասարճեան ըսաւ, որ անասնապահութեան եւ երկրագործութեան մէջ շուրջ 600,000 տոլար ներդրում եղած է: 199 գիւղ օգտուած է ԱՌԻի վարկերէն: Այս տարի 200 նոր ընտանիքներ օգտուած են ԱՌԻի վարկերէն, այսինքն՝ շուրջ 700 անհատ:

Ժողովի աւարտին ցուցադրուեցաւ Առիաւանի բացումը ներկայացնող ժապաւէնը, որուն յաջորդեց Արցախ փոխադրուած սփիւռքահայ երիտասարդի մը վաւերագրական ժապաւէնը:

Comments are closed.